Од 22 јули до 2 август 2025 година, Здружението на уметници ракотворци од Битола по 21-ви пат ја слави културата, традицијата и креативноста преку настанот „Во срцето на Битола“ – уникатна манифестација што ја оживува душата на традицијата и уметноста токму на најпрепознатливите локации во градот.

Во рамки на дванаесетдневната програма, посетителите ќе имаат можност да уживаат во изложби, обуки, саем на ракотворби, интерактивни работилници, музички настапи, фолклорни изведби и изложби на фотографии, поставени низ Широк Сокак и Офицерски дом – срцето на урбаната и културната историја на Битола.

Овој настан, кој веќе традиционално се вбројува меѓу најзначајните летни културни збиднувања, е дел од Програмата на Битолското културно лето и е поддржан од Министерството за култура и туризам како дел од активностите поврзани со развојот на креативните индустрии.

„Во срцето на Битола“ претставува жив спој на умешноста на вредните раце со современиот дух на културната сцена – настан што ја негува традицијата, но и инспирира нови генерации уметници.