„ЕЛЕГИЈА НА ЛОВОРОТ“ ДЕНЕС ВО КИНО МАНАКИ

Денес, на програмата на битолското културно лето, во рамките на Деновите на „See film festivalot“, вљубениците во филмот, од 20.00 часот во Кино Манаки, ќе можат да ја погледнат филмската проекција на „Елегија на ловорот“, во режија на Душан Касалица од Црна Гора, во времетраење од 90 минути. Филмот ја понесе наградата за најдобра режија на Европското жири 2022, на фестивалот на кинематограферите од Југоисточна Европа во Париз, Берлин и Вашингтон.

Станува збор за надреално патување полно со апсурдни превртувања.

Филип е софистициран универзитетски професор, кој оди со својата сопруга во хотел на брегот. По неколку дена поминати во удобниот и монотон амбиент на хотелот, нивниот навидум идеален брак завршува. Филип е оставен од неговата сопруга. Се чини дека сè укажува на тоа дека неговиот живот пропаѓа, но Филип, префинет и вооружен со самодоверба, се соочува со секоја нова околност со необична леснотија.

Длабоко во шумата, нов фантастичен свет ќе го сруши, но и ќе му даде шанса за нов почеток.
Филмската ревија „Денови на SEE Film Festival“ на БИТ ФЕСТ, ќе трае до 15 јули.